Santiago de Compostela, 14 de maio de 2024. Nesta conversa, Santiago Marta compártenos como foi a súa primeira experiencia laboral e como coñeceu a figura dos centros especiais de emprego de iniciativa social. Hoxe, traballa no CEEIS Combina Social, encargándose dos labores de conserxe e limpador no mercado municipal de Carballo. Un traballo no que se sinte moi a gusto e que lle permite poñer en acción o seu don de xentes.
Mira á inclusión laboral das persoas con discapacidade con optimismo, súa é a frase "hai unha oportunidade para cada perso"”. Ademais, pon en valor as facilidades que ofrecen os CEEIS á hora de adaptar os postos de traballo ás características e calidades de cada traballador ou traballadora.
- Cal foi a súa primeira experiencia no eido laboral? Garda un bo recordo dela?
Empecei como ferrallista aos 16 anos e estiven como sete anos traballando nese primeiro emprego. Gardo un bo recordo sobre todo do primeiro soldo (ri).
- Cando e como xorde a oportunidade de comezar a traballar no CEEIS? Que cargo ocupa?
Unha vez me deron a alta despois de operarme das costas, comecei a enviar currículos e pronto me chamaron desde Combina Social para limpar uns centros que teñen en Carballo, despois da pandemia.
Primeiro foi para cubrir unha baixa e despois dixeron que cando lles aparecera un posto que me chamaban e chamaron. Actualmente ocúpome dos labores de conserxe e limpador no mercado municipal de Carballo.
- Podería contarnos como é o seu día a día no centro?
Veño para o posto e encárgome de facer as tarefas que me corresponden como conserxe e limpador. Os luns e os mércores estou de mañá e o resto dos días da semana estou de tarde. A nosa empresa está no mercado desde as oito da mañá ata ás nove da noite.
Cando hai feiras os domingos miro quen ten carné e superviso que os postos se poidan montar ben.
- Que lle aporta este traballo? E vostede, que habilidades ou talentos cre que achega ao CEEIS?
A relación coas persoas é o que máis me gusta, a verdade é que este traballo permíteme coñecer a moita xente e eu son moi de relacións públicas.
Neste sentido, en canto ás miñas habilidades, teño facilidade de palabra e don de xentes. E neste traballo iso é moi importante porque temos unha relación continua cos praceiros para poder arranxarlle os problemas que teñan. Sempre que necesitan transmitirlle algo ao concello, dinmo a min e eu trasládollo.
- A que desafíos se tivo que enfrontar no ámbito laboral debido á súa discapacidade?
Pois sinceramente non vin desafíos, porque no CEEIS adaptáronse a min perfectamente, que non podo facer esforzos. Sempre que hai algún problema miran de adaptarse e buscarche unha solución.
Non sabía nada dos centros especiais de emprego de iniciativa social ata que me dixeron de COGAMI onde me informaron moi ben.
- No marco do Día Internacional dos Traballadores e Traballadoras, pensa que se recoñece a contribución das persoas con discapacidade ao mercado laboral?
Penso que si, que cada vez máis hai máis oportunidades para as persoas con discapacidade.
Hai unha oportunidade para cada persoa.
- Que cambios lle gustaría ver no ámbito laboral en relación á inclusión das persoas con discapacidade?
Con que lle sigan dando oportunidades ás persoas con discapacidade xa é un bo traballo. Penso que sería necesario que se coñecesen máis os CEEIS e o labor que fan. Grazas aos centros especiais de emprego dáselle unha oportunidade a moita xente.
- E a nivel persoal, ten algunha meta laboral no horizonte?
Intentar mellorar cada día e avanzar cara adiante sempre. As cousas non se forzan, vanse dando elas soas.